പി. എ. ചാക്കോ SJ
“എന്റെ വനവാസ കേന്ദ്രം നശിപ്പിച്ചതിനുശേഷം, ഞാൻ എന്തിനാണ് നിങ്ങളുടെ പ്രദേശത്തേക്ക് അലഞ്ഞുതിരിയുന്നത് എന്നു നിങ്ങൾ എന്നോട് ചോദിക്കുന്നത് എന്തുകൊണ്ടാണ്?”
ഒരു വനവാസി മൃഗം മനുഷ്യരോട് ചോദിക്കുന്ന ദശലക്ഷം ഡോളറുടെ ചോദ്യമാണിത്.
ഉത്കണ്ഠ നിറഞ്ഞ ഈ ചോദ്യത്തിന് ധാരാളം കാരണങ്ങളുണ്ട്. വികസനത്തിന്റെയും പുരോഗതിയുടെയും പേരിൽ, ആഘോഷകരമായ ജീവിതത്തോടുള്ള നമ്മുടെ ആവേശം, സമ്പത്ത് ശേഖരിക്കാനുള്ള നമ്മുടെ അത്യാഗ്രഹം, പ്രകൃതിയുടെ വിഭവങ്ങൾ അമിതമായി ചൂഷണം ചെയ്യാനുള്ള നമ്മുടെ ത്വര, എന്നിവ നമ്മെ ഇരപിടിയൻ മൃഗങ്ങളാക്കി മാറ്റിയിരിക്കുന്നു.
നമ്മുടെ മുദ്രാവാക്യം: ‘തൽക്ഷണ ആനന്ദം.’ പരിസ്ഥിതിയുമായും, സ്രഷ്ടി കർത്താവ് തന്റെ ഔദാര്യത്തിൽ നിന്ന് നൽകിയ എല്ലാറ്റുമായും സഹയാത്രികൾ ആണെന്ന വസ്തുതയ്ക്കു മുന്നിൽ ആ മുദ്രാവാക്യം നമ്മുടെ കണ്ണുകളെ മൂടുന്നു.
സൃഷ്ടിക്കപ്പെട്ട എല്ലാ യാഥാർത്ഥ്യങ്ങളും നമ്മുടെ സ്വകാര്യ സ്വത്താണെന്ന് നാം തെറ്റായി വിശ്വസിക്കുന്നു. നമ്മുടെ അഹങ്കാരപരമായ ചിന്താഗതി, നാം സർവേ ചെയ്യുന്ന എല്ലാത്തിന്റെയും കർത്താക്കൾ നാം ആണെന്ന് വിശ്വസിക്കാൻ നമ്മെ പ്രേരിപ്പിക്കുന്നു. സൃഷ്ടിയുടെ സംരക്ഷകരല്ല, ഉടമസ്ഥരായി പ്രവർത്തിക്കാൻ ഈ തെറ്റായ ധാരണ നമ്മെ പ്രേരിപ്പിക്കുന്നു.
പരിസ്ഥിതിയുടെ പശ്ചാത്തലത്തിൽ, നമ്മുടെ മുന്നിൽ ഉറ്റുനോക്കുന്ന നിർണായക പ്രശ്‌നങ്ങളിൽ നിന്ന് വ്യക്തമാകുന്നത്, മനുഷ്യരായ നമ്മൾ നമ്മുടെ ഗൃഹപാഠം ചെയ്യാത്തതിൽ കുറ്റക്കാരാണ് എന്നാണ്. നമ്മുടെ പരിസ്ഥിതിയെ അനുഗമിക്കുന്നതിനു പകരം, നമ്മൾ അതിനെ ചൂഷണം ചെയ്യുകയും, അതിനെ ദോഷം ചെയ്യുകയും, നശിപ്പിക്കുകയും ചെയ്യുന്നു. അത്യാഗ്രഹം നമ്മെ കീഴടക്കിയിരിക്കുന്നു. അത്യാഗ്രഹത്തിന് അനുകൂലമായി നമ്മുടെ ലളിത ആവശ്യങ്ങൾ നമ്മുടെ പിൻമുറ്റങ്ങളിലേക്ക് തള്ളിവിട്ടിരിക്കുന്നു.
മഹാത്മാഗാന്ധിയുടെ ജ്ഞാനവാക്കുകൾ നമ്മുടെ അത്യാഗ്രഹത്തെക്കുറിച്ചുള്ള കർശനമായ മുന്നറിയിപ്പാണ്. ഭൂമിയുടെ സമൃദ്ധ വിഭവങ്ങൾ നമ്മുടെ ആവശ്യങ്ങൾക്ക് പര്യാപ്തമാണ്, പക്ഷേ നമ്മുടെ അത്യാഗ്രഹത്തിന് എല്ലാവർക്കും പര്യാപ്തമാകുന്നില്ല! എത്രയോ ശരി!
നമ്മൾ കാടുകൾ വെട്ടിത്തെളിക്കുകയും അംബരചുംബികളായ കെട്ടിടങ്ങളുടെ ഭൂങ്കാവനങ്ങൾ നിർമ്മിക്കുകയും ചെയ്യുന്നു. പിന്നെ നമ്മൾ ക്രോട്ടണുകളും നഴ്‌സറി സസ്യങ്ങളും വാങ്ങി അമ്പരചുംബികളായ മാളിക മുകളിൽ ഒരു പച്ചനിറം നൽകുന്നതിനായി അവയെ ചെടിച്ഛട്ടികൾ കൊണ്ട് അലങ്കരിക്കുന്നു.
വേട്ടയാടൽ, മരം വെട്ടി മുറിക്കൽ, ഖനനം, വാണിജ്യ കൃഷി എന്നിവയ്ക്കായി നമ്മൾ വനങ്ങൾ കൈയടക്കുന്നു. നമ്മുടെ കൊള്ള തുടർച്ചയായി തുടരുന്നു.
ഇന്ന്, മനുഷ്യ കുടിയേറ്റം മാത്രമല്ല, മൃഗ കുടിയേറ്റം ഒരു സാധാരണ പ്രതിഭാസമായി മാറിയിരിക്കുന്നു. വനത്തിൽ അധിഷ്ഠിതമായ മൃഗങ്ങൾ വീടില്ലാത്തവരും വിശക്കുന്നവരുമായി മാറുന്നു. ഭക്ഷണം, വെള്ളം, പാർപ്പിടം എന്നിവയ്ക്കായി അവ ഗ്രാമങ്ങളിലും പട്ടണങ്ങളിലും നഗരങ്ങളിലും അലഞ്ഞുനടക്കുന്നു. വന്യമൃഗങ്ങൾ നിങ്ങളുടെ സ്വത്തോ തോട്ടമോ അതിക്രമിച്ചു കയറുന്നുവെന്ന് നിങ്ങൾ പരാതിപ്പെടുന്നു. ‘ഈ ദുരന്തത്തിന് ആരാണ് ഉത്തരവാദി?’ എന്ന് സ്വയം ചോദിക്കാതെ നിർണായകമായ വിഷയം നിങ്ങൾ സൗകര്യപൂർവ്വം മറച്ചുവെക്കുന്നു. ‘എന്തുകൊണ്ടാണ് നിങ്ങൾ ഞങ്ങളുടെ സുരക്ഷിതമായ വാസസ്ഥലം നശിപ്പിച്ച് തോട്ടങ്ങളും പാർപ്പിട സമുച്ചയങ്ങളും നിർമ്മിച്ചത്’ എന്ന് ഒരു ആന നിങ്ങളോട് ചോദിച്ചാൽ, നിങ്ങൾ എന്തെങ്കിലും വ്യക്തമായ ഉത്തരം നൽകുമോ?
ഈ ഭൂമിയിൽ നമ്മൾ എന്താണ്, എന്തിനു വേണ്ടിയാണ്? മൃഗങ്ങളും പക്ഷികളും, വനങ്ങളും താഴ്‌വരകളും, സമുദ്രങ്ങളും പാറക്കെട്ടുകളും മറ്റ് ഗ്രഹങ്ങളിൽ നിന്നുള്ള അന്യഗ്രഹ ആക്രമണകാരികളാണോ? എന്ന് സ്വയം ചോദിക്കേണ്ട സമയം അതിക്രമിച്ചിരിക്കുന്നു.
ഈ വർഷത്തെ യുഎൻ നിർദ്ദേശിച്ച വിഷയം: ‘പ്ലാസ്റ്റിക് മലിനീകരണത്തെ തുടച്ചു നീക്കുക’ എന്നതാണ്. തീർച്ചയായും, പ്ലാസ്റ്റിക് മലിനീകരണം മനുഷ്യനിർമ്മിത ദുരന്തമായി മാറിയിരിക്കുന്നു. ഈ ഭീഷണിയെ നേരിടേണ്ടത് പ്രധാനമാണ്. എന്നിരുന്നാലും, നമ്മുടെ ശ്രദ്ധ വെറും പ്ലാസ്റ്റിക്കുകൾക്ക് അപ്പുറത്തേക്ക് പോകണം. ശ്രദ്ധാകേന്ദ്രം നമ്മുടെ ജീവിതശൈലി, നമ്മുടെ മൂല്യവ്യവസ്ഥ, വികസനത്തിന്റെയും പുരോഗതിയുടെയും കാഴ്ചപ്പാട് എന്നിവയായിരിക്കണം.
കാലാവസ്ഥാ വ്യതിയാനം പ്രധാനമായും നമ്മുടെ ഉപഭോഗ രീതി, നമ്മുടെ ജീവിതശൈലി, മണ്ണിന്റെ ഉപയോഗം, സമുദ്രങ്ങൾ, വനങ്ങൾ, മറ്റ് എല്ലാ വിഭവങ്ങളൾ എന്നിവയുമായി ബന്ധപ്പെട്ടിരിക്കുന്നു.
നാം ജൈവ വൈവിധ്യത്തിനെതിരെ യുദ്ധം ചെയ്യുന്നു. നമ്മുടെ അതിർത്തികൾക്കപ്പുറമുള്ള കയ്യേറ്റ യുദ്ധങ്ങളും ബോംബുകളും ഭൂമിയുടെ ആവാസ വ്യവസ്ഥയെ മലിനമാക്കുകയും നശിപ്പിക്കുകയും ചെയ്യുന്നു. മനുഷ്യരെയും ആവാസ വ്യവസ്ഥകളെയും ഇല്ലാതാക്കുന്നു. ഈ ബുദ്ധിശൂന്യമായ പ്രവർത്തനങ്ങൾ നമ്മെ അലട്ടുന്നില്ല, നാം ചോദ്യം ചെയ്യുന്നില്ല.
പരിസ്ഥിതി നശീകരണത്തെക്കുറിച്ച് ചില ആശങ്കാകുലരായ ആളുകൾ സംസാരിക്കുന്നു. വായു, ജലം, മണ്ണ് തുടങ്ങിയ വിഭവങ്ങളുടെ ശോഷണം, ആവാസ വ്യവസ്ഥയുടെ നാശം, വന്യജീവികളുടെ വംശ നാശം, പ്രകൃതിയുടെയും പ്രകൃതി വിഭവങ്ങളുടെയും അമിത ചൂഷണം തുടങ്ങിയ പശ്ചാത്തലത്തിൽ പരിസ്ഥിതി നശീകരണത്തെ കാണണമെന്ന് അതിന്റെ വക്താക്കൾ പറയുന്നു.
പരിസ്ഥിതി സംരക്ഷണം മനുഷ്യന്റെ സുരക്ഷയുടെയും സുഖത്തി ന്റെയും പശ്ചാത്തലത്തിൽ മാത്രമല്ല കാണേണ്ടത്. സൃഷ്ടിക്ക് ഒരു ലക്ഷ്യമുണ്ട്. ഒരു ദിശാമാർഗ്ഗമുണ്ട്. അതിന്റെ പങ്ക് മനുഷ്യന്റെ ആവശ്യങ്ങൾ നിറവേറ്റുക മാത്രമല്ല. അത് മനുഷ്യന്റെ കളിപ്പാട്ടമല്ല.
രണ്ടായിരം വർഷങ്ങൾക്ക് മുമ്പ് സെന്റ് പോൾ “സൃഷ്ടി ഞരങ്ങിക്കൊണ്ടിരിക്കുന്നു” എന്ന സത്യം പ്രസ്താവിച്ചു. അത് ഇപ്പോഴും ഞരങ്ങുന്നു, അതിലും കൂടുതൽ!
ഫ്രഞ്ച് ജെസ്യൂട്ട് പുരോഹിതനും ശാസ്ത്രജ്ഞനും പാലിയന്റോളജിസ്റ്റും ദൈവശാസ്ത്രജ്ഞനുമായ ടെയിലാർഡ് ഡി ഷർഡയിൻ പ്രപഞ്ച പരിണാമത്തെക്കുറിച്ച് സംസാരിച്ചു. പരിണാമം തുടർച്ചയായി നടന്നു കൊണ്ടിരിക്കുന്നു.
നാം മനുഷ്യർ ഈ പ്രപഞ്ച ഘടനയുടെ ഒരു ഭാഗം മാത്രമാണ്. ബുദ്ധിശക്തിയും ഇന്ദ്രിയങ്ങളും കൊണ്ട് അനുഗ്രഹീതരായ നമ്മുടെ പങ്ക്, മെച്ചപ്പെട്ടതും ഉദാത്തവുമായ ഒരു രൂപത്തിലേക്കുള്ള ഈ പരിണാമ പുരോഗമനത്തെ സുഗമമാക്കുക എന്നതായിരിക്കണം. അതിനെ തടയുകയോ, കല്ലെറിയുകയോ ചെയ്യരുത്. ആ സുഗമമാക്കൽ പ്രക്രിയ നമ്മുടെ ശ്രേഷ്ഠമായ തൊഴിലായിരിക്കണം.
വരൂ, നമ്മുടെ പരിസ്ഥിതിയെയും നമ്മുടെ പ്രപഞ്ചത്തെയും അതിജീവിക്കാനും അഭിവൃദ്ധിപ്പെടുത്താനും അതിന്റെ ലക്ഷ്യത്തിൽ എത്താനും അനുവദിക്കുന്നതിന് നമുക്ക് എല്ലാ സന്മനസ്സുള്ള ആളുകളോടും പ്രകൃതിയുടെ എല്ലാ ശക്തികളോടും ഈ പ്രപഞ്ചത്തോടും കൈകൾ കോർക്കാം.